८७ वर्षांची परंपरा आजही कायम; श्रीहरी बालविकास गणेशोत्सव मंडळाचा उत्सव ठरतोय सामाजिक समरसतेचा संदेश

धार्मिक, सामाजिक व प्रबोधनात्मक उपक्रमांसह पर्यावरण संवर्धनाचा जागर; भजन-दिंडीने गणरायाला निरोप देण्याची परंपरा

उप संपादक 

विलास मोहिणकर 

चंद्रपूर : - चंद्रपूर जिल्ह्यातील चिमूर शहराच्या मध्यवर्ती भागातील टिळक वॉर्ड हा धार्मिकता, सामाजिक समरसता आणि सांस्कृतिक परंपरा जपणारा वॉर्ड म्हणून ओळखला जातो. याच वॉर्डात मागील ८७ वर्षांपासून श्रीहरी बालविकास गणेश उत्सव समितीच्या वतीने श्री गणेशोत्सवाची परंपरा अखंडपणे सुरू आहे. बदलत्या काळानुसार उत्सवाचे स्वरूप बदलत असले, तरी मंडळाने जुन्या परंपरा आणि संस्कृतीची नाळ आजही घट्ट धरून ठेवली आहे.

स्वातंत्र्यपूर्व काळात लोकमान्य बाळ गंगाधर टिळक यांनी सार्वजनिक गणेशोत्सवाच्या माध्यमातून समाजाला एकत्र आणण्याचे आणि जनजागृतीचे कार्य केले. त्याच सामाजिक एकतेच्या आणि प्रबोधनाच्या विचारांची प्रेरणा घेत चिमूरमधील श्रीहरी बालविकास गणेश उत्सव समिती गेल्या ८७ वर्षांपासून गणेशोत्सव साजरा करीत आहे.

मंडळाच्या वतीने केवळ धार्मिक कार्यक्रमांवर भर न देता सामाजिक, धार्मिक आणि प्रबोधनात्मक विविध उपक्रमांचे आयोजन केले जाते. समाजात एकोपा, बंधुभाव आणि सामाजिक समरसता निर्माण व्हावी, यासाठी मंडळाचे पदाधिकारी व कार्यकर्ते सातत्याने प्रयत्नशील असतात.

विशेष म्हणजे, पर्यावरण संवर्धनाचा संदेश देत पर्यावरणपूरक पद्धतीने उत्सव साजरा करण्यावरही मंडळाचा भर असतो. गणेश विसर्जनाच्या वेळी पारंपरिक भजन-दिंडीचे आयोजन करून भक्तिमय वातावरणात गणरायाला निरोप देण्याची परंपराही मंडळाने जपली आहे.

तरुणाईच्या सहभागातून परंपरेला नवी ऊर्जा

८७ वर्षांची ही परंपरा पुढे नेण्यात मंडळातील ज्येष्ठांसोबतच नवीन पिढीतील तरुणांचा सहभाग महत्त्वाचा ठरत आहे. दरवर्षी नवीन तरुण उत्सवाच्या आयोजनात पुढाकार घेत असून, जुन्या परंपरांना आधुनिक विचारांची जोड देत गणेशोत्सव साजरा केला जात आहे.

धार्मिकतेसोबतच सामाजिक बांधिलकी, प्रबोधन, पर्यावरण संवर्धन आणि सामाजिक समरसतेचा संदेश देणारा श्रीहरी बालविकास गणेश उत्सव समितीचा ८७ वर्षांचा प्रवास चिमूरच्या सांस्कृतिक इतिहासातील एक महत्त्वपूर्ण परंपरा ठरत आहे. काळ बदलला, पिढ्या बदलल्या; मात्र गणरायाच्या भक्तीसोबत समाजप्रबोधनाची ही परंपरा आजही तितक्याच उत्साहाने सुरू आहे.