"सुशिक्षित बेरोजगारांना उद्योग आणि रोजगार द्या!"

सुशिक्षित बेरोजगारांच्या भवितव्यासाठी लोकप्रतिनिधिंनी पुढाकार घ्यावा : सामाजिक कार्यकर्ते एम. कुमार जुमळे

चिमूरच्या शहीद भूमीत उद्योगांची क्रांती घडवा; सुशिक्षित तरुणांच्या हाताला काम द्या, अन्यथा जनतेचा रोष अटळ

उप संपादक 

विलास मोहिणकर 

चंद्रपूर : - चंद्रपूर जिल्ह्यातील चिमूर तालुक्यातील वाढती बेरोजगारी, शिक्षण पूर्ण करूनही रोजगारासाठी होणारी तरुणांची भटकंती आणि स्थानिक पातळीवर उद्योगांचा अभाव या गंभीर प्रश्नांकडे लक्ष वेधत सामाजिक कार्यकर्ते एम. कुमार जुमळे यांनी स्थानिक आमदारांना थेट सवाल केला आहे.

"निवडणुकीच्या वेळी रोजगाराची आश्वासने दिली जातात; मात्र निवडणूक संपल्यानंतर सुशिक्षित बेरोजगारांचा विषय पुन्हा मागे पडतो. अखेर चिमूरच्या युवकांनी किती दिवस नोकरीच्या प्रतीक्षेत राहायचे?" असा संतप्त प्रश्न त्यांनी उपस्थित केला.

एम. कुमार जुमळे म्हणाले की, भारत हा कृषिप्रधान देश आहे आणि चिमूर परिसर हा शेतीप्रधान भाग म्हणून ओळखला जातो. येथील शेतकरी मोठ्या प्रमाणावर धान, कापूस, सोयाबीन, हळद तसेच विविध कृषी उत्पादने घेतात. मात्र या उत्पादनांवर प्रक्रिया करणारे उद्योग नसल्यामुळे शेतकऱ्यांना योग्य दर मिळत नाही आणि हजारो तरुणांना रोजगारासाठी नागपूर, पुणे, मुंबई, हैदराबाद किंवा इतर शहरांकडे स्थलांतर करावे लागते.

चिमूर ही केवळ एक तालुका मुख्यालयाची भूमी नसून स्वातंत्र्यलढ्यातील शौर्यगाथा जपणारी क्रांतिवीरांची आणि शहीदांची पवित्र भूमी आहे. या भूमीला देशाच्या राष्ट्रपतींनीही भेट देऊन अभिवादन केले आहे. अशी ऐतिहासिक ओळख असलेल्या चिमूरला आज उद्योगांच्या नकाशावर स्थान मिळाले पाहिजे, अशी मागणी त्यांनी केली.

त्यांच्या मते, आता केवळ आश्वासने नकोत; तर प्रत्यक्ष कृतीची वेळ आली आहे. चिमूर परिसरात अत्याधुनिक ॲग्रो इंडस्ट्रियल पार्क, अन्न प्रक्रिया उद्योग, धान प्रक्रिया केंद्र, कापूस प्रक्रिया उद्योग, कोल्ड स्टोरेज, वेअरहाऊस, पॅकेजिंग युनिट, कृषी संशोधन केंद्र आणि लघु-मध्यम उद्योगांचे संकुल उभारण्यात आले तर हजारो स्थानिक युवक-युवतींना रोजगाराच्या नव्या संधी उपलब्ध होतील. शेतकऱ्यांकडील कृषीमालाला मूल्यवर्धन मिळेल आणि स्थानिक अर्थव्यवस्थेलाही मोठी चालना मिळेल.

एम. कुमार जुमळे यांनी स्थानिक आमदारांना उद्देशून म्हटले की, "विकासाची खरी ओळख मोठमोठ्या भाषणांत नसते, तर तरुणांच्या हाताला काम देण्यात असते. बेरोजगारांच्या डोळ्यातील स्वप्ने पूर्ण करण्यासाठी उद्योग आणण्याचे धाडस दाखवा. शासनाकडे सातत्याने पाठपुरावा करून चिमूरसाठी विशेष औद्योगिक धोरण, औद्योगिक वसाहत आणि गुंतवणूक प्रकल्प मंजूर करून आणा."

ते पुढे म्हणाले की, आज हजारो सुशिक्षित तरुण पदव्या घेऊन घरात बसले आहेत. अनेकांनी स्पर्धा परीक्षा दिल्या, काहींनी उच्च शिक्षण पूर्ण केले, तर काहींनी कौशल्य प्रशिक्षण घेतले; परंतु स्थानिक पातळीवर रोजगार उपलब्ध नसल्यामुळे त्यांना इतर जिल्ह्यांमध्ये स्थलांतर करावे लागत आहे. ही परिस्थिती बदलण्यासाठी लोकप्रतिनिधींनी आता ठोस भूमिका घेणे अत्यंत आवश्यक आहे.

जुमळे यांनी स्पष्ट इशारा देत सांगितले की, "जर चिमूरच्या युवकांना रोजगार, उद्योग आणि विकास मिळत नसेल तर जनतेला लोकशाही मार्गाने आवाज उठवण्याचा पूर्ण अधिकार आहे. विकासाच्या नावावर केवळ घोषणा नकोत; रोजगार देणारे उद्योग हवे. जनतेच्या प्रश्नांवर मौन धारण करणाऱ्यांना आगामी काळात जनता निश्चितच जाब विचारेल."

एम. कुमार जुमळे यांच्या प्रमुख मागण्या

- चिमूरमध्ये मोठा ॲग्रो इंडस्ट्रियल पार्क मंजूर करावा.

- कृषी उत्पादन प्रक्रिया उद्योगांना विशेष प्रोत्साहन द्यावे.

- स्थानिक युवकांसाठी रोजगारनिर्मिती करणारी औद्योगिक वसाहत उभारावी.

- स्थानिकांना प्राधान्याने रोजगार देण्याचे धोरण राबवावे.

- कौशल्य विकास व उद्योजकता प्रशिक्षण केंद्र सुरू करावे.

- शेतकऱ्यांचा माल थेट खरेदी करून मूल्यवर्धन करणारे उद्योग उभारावेत.

- राज्य व केंद्र शासनाकडून विशेष औद्योगिक पॅकेज मिळवण्यासाठी आमदारांनी पुढाकार घ्यावा.

"चिमूरच्या शहीद भूमीला केवळ इतिहासाचा अभिमान नको, तर उद्योग, रोजगार आणि विकासाचे नवे भविष्यही मिळाले पाहिजे. सुशिक्षित बेरोजगारांच्या हाताला काम देणे हीच आजच्या लोकप्रतिनिधींची खरी परीक्षा आहे," असे आवाहन सामाजिक कार्यकर्ते एम. कुमार जुमळे यांनी केले.