बोगस मतदार नोंदणीचा आरोप : रोहित बोमावार यांच्या नावावर विजय कोरेवार यांचा आक्षेप

🏠 मतदाराचा पत्ता एक खोलीत वास्तव्याचा..

सावली, ता. १७ ऑक्टोबर —

देशभरात बोगस मतदार नोंदणीच्या तक्रारींना उधाण आलेले असतानाच सावली तालुक्यातील खेडी ग्रामपंचायतीतही अशाच प्रकाराचा वाद उफाळला आहे. मध्यवर्ती सहकारी बँकेचे संचालक रोहित चरणदास बोमावार यांच्या नावाची मतदार नोंदणी खेडी गावात असल्याचे उघड झाल्याने सावली पंचायत समितीचे माजी सभापती विजय कोरेवार यांनी आक्षेप नोंदवत ही नोंद बोगस असल्याचा आरोप केला आहे.

🗳️ खेडीत रहिवास नसतांनाही नाव नोंदवले

जिल्हा परिषद आणि पंचायत समिती निवडणुकीसाठी २०२५ ची प्रारूप मतदार यादी जाहीर झाली असून त्यात खेडी गावातील बूथ क्रमांक २८६ मध्ये रोहित बोमावार यांचे नाव समाविष्ट आहे. मात्र, ते खेडी येथील रहिवासी नसून सावली नगरपंचायत क्षेत्रातील रहिवासी असल्याचे कोरेवार यांनी नमूद केले आहे. बोमावार यांच्या आधारकार्ड व इतर कागदपत्रांवर सावली येथील पत्ता असल्याचा त्यांनी पुरावा दिला आहे.

---

🏚️ ३१ क्रमांकाच्या खोलीचा पत्ता संशयास्पद

मतदार यादीत बोमावार यांच्या घराचा पत्ता ३१ क्रमांकाचा दाखविण्यात आला आहे. परंतु, ही जागा गोंड समाजाच्या मालकीचे एक २१५ चौरस फुटांचे खोलीचे बांधकाम असून त्यात समाजाचे भांडे ठेवलेले आहेत. स्वयंपाकघर, बाथरूम किंवा संडास नसलेल्या या खोलीत वास्तव्य शक्य नसताना, त्याच पत्त्यावर मतदार नोंद झाल्याने शंका अधिकच गडद झाली आहे.

---

👨‍👩‍👦‍👦 कुटुंबीयांचे मतदान सावली शहरातच

रोहित बोमावार यांचे वडील, आई, पत्नी आणि भाऊ यांचे मतदान सावली नगरपंचायत क्षेत्रातील २८१ क्रमांकाच्या यादीत आहे. त्यामुळे ते स्वतःही सावली येथील कायम रहिवासी असून, खोट्या कागदपत्रांच्या आधारे खेडी येथील मतदार यादीत नाव समाविष्ट केल्याचा विजय कोरेवार यांचा आरोप आहे.

---

📋 नवीन मतदार मध्यभागी कसे?

सामान्यतः नवीन नोंद झालेल्या मतदारांचे नाव यादीच्या शेवटी येते. मात्र, बोमावार यांनी २०२४ मध्ये नोंदणी केली असूनही त्यांचे नाव १४९ व्या क्रमांकावर आहे. त्याच यादीत २००१ पासून असलेले विजय कोरेवार यांचे नाव ११८१ क्रमांकावर आहे. हे पाहता, नाव “लपविण्याच्या हेतूने” मध्यभागी बोगसपणे घुसविले गेल्याचा आरोप त्यांनी केला आहे.

---

🧾 आक्षेपानंतर पुरावे गोळा करण्याची धांदल

१४ ऑक्टोबर रोजी कोरेवार यांनी आक्षेप दाखल केल्यानंतर लगेच दुसऱ्याच दिवशी, १५ ऑक्टोबर रोजी रुपाली बोमावार यांनी शेतात घर असल्याचे दाखविण्यासाठी अर्ज दाखल केला, अशी माहिती समोर आली आहे. यावरून, नंतर पुरावे तयार करण्याचा प्रयत्न सुरू असल्याचा आरोप करण्यात आला आहे.

---

💰 कोट्यवधींच्या बंगल्याचे मालक, तरी भाड्याच्या घरात?

रोहित बोमावार यांचा सावलीजवळ ‘व्हाईट हाऊस’ नावाचा कोट्यवधी किमतीचा बंगला असून, तरीदेखील खेडी येथे भाड्याने खोली घेतल्याचा करारनामा करण्यात आल्याची माहिती सूत्रांकडून मिळाली आहे. त्यामुळे “इतक्या संपन्न व्यक्तीने भाड्याच्या छोट्या खोलीत रहाण्याचा दाखला देणे का आवश्यक झाले?” हा प्रश्न स्थानिक पातळीवर चर्चेचा विषय ठरला आहे.

---

⚖️ निवडणूक विभागाच्या भूमिकेकडे लक्ष

या सर्व प्रकरणावर विजय कोरेवार यांनी मतदार नोंदणी रद्द करण्याची औपचारिक मागणी केली असून, निवडणूक विभागाकडून कोणते आदेश येतात याकडे सावली तालुक्याचे लक्ष लागले आहे.