बल्लारपूर “बालाजी कॉम्प्लेक्सची दररोजची डोकेदुखी – पार्किंगचा प्रश्न कायम” प्रशासन मूकदर्शक, नागरिक त्रस्त

बल्लारपूर प्रतिनिधी वसंत मुन

नवीन सिमेंट रोड तयार – पण पार्किंगचा प्रश्न तसाच,

बल्लारपूर :बल्लारपूर शहरातील सुभाष टॉकीज ते खत्री मार्गावर नुकताच नवीन सिमेंट रोड तयार झाला. नागरिकांनी यामुळे काही प्रमाणात दिलासा व्यक्त केला असला, तरी बालाजी कॉम्प्लेक्स परिसरातील पार्किंगचा जुना प्रश्न मात्र अजूनही कायम आहे.

शहरातील बालाजी कॉम्प्लेक्स परिसरातील पार्किंगचा प्रश्न दिवसेंदिवस गंभीर होत चालला आहे. अनेक वर्षांपासून सुरू असलेली ही समस्या आजतागायत मार्गी लागलेली नाही. कॉम्प्लेक्सच्या आजूबाजूला गाड्यांसाठी अधिकृत पार्किंगची कोणतीही सोय नसल्याने वाहनचालकांना मोठ्या अडचणींचा सामना करावा लागत आहे.

नवीन रस्ता, पण जुनाच प्रश्न

रस्ता दुरुस्ती व सिमेंटकरणावर लाखो रुपये खर्च करण्यात आले. रस्त्याची पृष्ठभाग गुळगुळीत झाला, वाहतुकीस सोयीस्कर वातावरण निर्माण झाले. मात्र रस्ता सुंदर झाला तरी पार्किंगच्या सोयीसाठी काहीही नियोजन करण्यात आलेले नाही. वाहनचालकांना आजही गाड्या उभ्या करण्यासाठी जागा नाही.

नागरिकांचे म्हणणे आहे की, "दररोज आम्हाला गाड्या उभ्या करण्यासाठी जागा मिळत नाही. व्यापारी व ग्राहक दोघेही या समस्येमुळे त्रस्त झाले आहेत. अनेक वेळा तक्रारी करूनही कुणी दखल घेत नाही."

स्थानिक नागरिकांचे म्हणणे आहे की, "रस्ता झाला हे चांगले झाले, पण पार्किंगचा विचार न केल्याने समस्या जसच्या तशी आहे. वर्षानुवर्षे याकडे दुर्लक्ष होत आहे. प्रशासन फक्त रस्ते बनवण्यात व्यस्त आहे, पण नागरिकांच्या खरी समस्या सोडवण्यात मागे आहे."स्थानिकांच्या मागणीप्रमाणे प्रशासनाने तातडीने ठोस उपाययोजना करणे गरजेचे आहे, अन्यथा ही समस्या आणखी गंभीर होणार आहे.

प्रशासनाकडून दुर्लक्ष?

पार्किंगच्या या गंभीर प्रश्नावर प्रशासनाने अद्याप कोणतीही ठोस उपाययोजना केलेली नाही.

पुढे काय?

शहरात वाढत्या वाहनसंख्येसोबत पार्किंगची व्यवस्था करणे अत्यावश्यक झाले आहे. नवीन रस्ते बनवले जात आहेत, पण "पार्किंगच्या प्रश्नाकडे प्रशासन लक्ष देणार की नाही?" हा प्रश्न नागरिक विचारत आहे.