रोजगार हमी योजनेतून शेत पांदन रस्ते खडीकरण करण्यात यावे - माजी सभापती कोरेवार यांची मागणी तालुक्यात पांदन रस्त्यांची स्थिती गंभीर

सावली - दळणवळणाची सोय व्हावी याकरिता गावागावाला रस्ते निर्माण होऊन शहरापर्यंत पोहचले आहे. मात्र गावातील लोकांचे एकमेव उदरनिर्वाहाचे साधन शेती असतांना शेतात जाणारे रस्ते  फार चिखलमय असल्याने शेतकरी, मजुरांना पायीही जाता येत नसल्याने प्राधान्याने हे रस्ते मग्रारोहयोतून खडीकरण करण्याची मागणी माजी पंचायत समिती सभापती विजय कोरेवार यांनी संवर्ग विकास अधिकारी यांचेकडे केली आहे. 

       शेतातील शेतमाल आणण्यासाठी, खते बियाणे ने आण करण्यासाठी, बैलबंडी, गुरे, ट्रॅक्टर, शेतकरी, मजूर, व्यापारी यांना शेतापर्यंत जाण्यासाठी मजबूत रस्त्यांची आवश्यकता असते. महात्मा गांधी ग्रामीण रोजगार हमी योजनेतून पांदन रस्त्याचे मातीकाम व मुरूमचे काम झाले मात्र जडवाहतुकीमुळे हे सर्व रस्ते फार चिखलमय झाले असून वाहने सोडून माणसांनाही पायदळ जाता येत नाही. सावली तालुका हा केवळ शेतीवर अवलंबुन असणारा असून शेतापर्यंत जाण्यासाठी मजबूत रस्त्यांची गरज आहे. रस्ते मजबूत असल्यास बेरोजगार युवकांचेही शेतीकडे कल वाढेल.  हे रस्ते केवळ ग्रामीण रोजगार हमी योजनेतूनच होऊ शकतात मात्र प्रशासन हे रस्ते न घेता गावातील सिमेंट रस्ते, गोडाऊन, सभागृह, गट्टूची रस्ते अशी बांधकामे करीत आहेत त्यामुळे या योजनेतून प्राधान्याने पांदन रस्ते मजबूत करावे ही मागणी विजय कोरेवार यांनी संवर्ग विकास अधिकारी यांचेकडे केली आहे.

पांदन रस्ते मजबूतीकरणाची मागणी रास्त असून महात्मा गांधी ग्रामीण रोजगार हमी योजनेतून प्राधान्याने करणार. ग्रामपंचायतनी आपल्या आराखड्यात पांदन रस्ते प्रस्तावित केलेले असावे.

मधुकर वासनिक

संवर्ग विकास अधिकारी 

पंचायत समिती सावली