मेटेपार येथे वाघाचा बैलावर हल्ला!

बैल गंभीर जखमी; परिसरात वाघाच्या दहशतीने नागरिकांमध्ये भीतीचे वातावरण

तालूका - प्रतिनिधी ( केवलसिंग जुनी )

चिमूर : - चिमूर तालुक्यातील मौजा मेटेपार येथे वाघाने बैलावर हल्ला केल्याची घटना दि. ११ ऑक्टोबर २०२६ रोजी रात्री घडली. या हल्ल्यात बर्मानंद शेंडे यांच्या गोठ्यात बांधलेला बैल जखमी झाला. बैलाने दोरी तोडल्यामुळे त्याचा जीव थोडक्यात बचावला. या घटनेमुळे मेटेपार परिसरातील नागरिकांमध्ये भीतीचे वातावरण निर्माण झाले असून, वनविभागाने तातडीने वाघाचा बंदोबस्त करावा, अशी मागणी नागरिकांकडून केली जात आहे.

रात्रीच्या वेळी वाघाचा गोठ्यात शिरकाव

मिळालेल्या माहितीनुसार, मेटेपार येथील बर्मानंद शेंडे यांनी आपला बैल गोठ्यात बांधून ठेवला होता. दरम्यान, रात्रीच्या सुमारास वाघाने गोठ्यात बांधलेल्या बैलावर हल्ला केला. या हल्ल्यात बैल जखमी झाला. हल्ल्यादरम्यान बैलाने दोरी तोडल्याने त्याची वाघाच्या तावडीतून सुटका झाली आणि मोठा अनर्थ टळला.

या घटनेमुळे पशुपालकांमध्ये चिंतेचे वातावरण निर्माण झाले आहे. शेतकरी आणि पशुपालक आपल्या जनावरांना गोठ्यात बांधून ठेवतानाही सुरक्षित नसल्याची भावना परिसरातील नागरिकांमध्ये व्यक्त होत आहे.

वनविभागाकडून घटनास्थळाचा पंचनामा

घटनेची माहिती वनविभागाला देण्यात आली. त्यानंतर वनरक्षक कालीदास गायवाड यांनी घटनास्थळी जाऊन घटनेचा पंचनामा केला. मात्र, वाघाच्या वाढत्या वावरामुळे परिसरातील नागरिकांमध्ये भीती कायम आहे.

चिमूर तालुक्यात वाघाच्या हल्ल्यांच्या आणि वन्यप्राण्यांच्या वावराच्या घटनांमुळे नागरिकांच्या सुरक्षिततेचा प्रश्न ऐरणीवर आला आहे. विशेषतः गावालगतच्या शेतशिवारात काम करणारे शेतकरी, शेतमजूर, पशुपालक आणि रात्रीच्या वेळी बाहेर पडणाऱ्या नागरिकांमध्ये भीतीचे वातावरण आहे.

तातडीची आर्थिक मदत आणि वाघाचा बंदोबस्त करण्याची मागणी

वाघाच्या हल्ल्यात बैल जखमी झाल्याने बर्मानंद शेंडे यांचे नुकसान झाले आहे. त्यामुळे वनविभागाने घटनेची गांभीर्याने दखल घेऊन नियमानुसार तातडीने आर्थिक मदत द्यावी, अशी मागणी होत आहे.

तसेच, परिसरात वाघ किंवा अन्य वन्यप्राण्यांचा वावर असल्यास त्यावर नियंत्रण ठेवण्यासाठी वनविभागाने प्रभावी उपाययोजना कराव्यात. नागरिकांच्या सुरक्षिततेसाठी नियमित गस्त वाढवावी, वन्यप्राण्यांच्या हालचालींवर लक्ष ठेवावे आणि आवश्यकतेनुसार योग्य प्रतिबंधात्मक उपाय करावेत, अशी मागणी स्थानिक नागरिकांकडून केली जात आहे.

वन्यप्राण्यांच्या वाढत्या वावरामुळे नागरिकांच्या जीवितासह पाळीव जनावरांच्या सुरक्षिततेचाही प्रश्न निर्माण झाला आहे. त्यामुळे एखादी मोठी दुर्घटना घडण्यापूर्वीच वनविभागाने तातडीने उपाययोजना करून नागरिकांना दिलासा द्यावा, अशी अपेक्षा मेटेपार परिसरातील नागरिक व्यक्त करीत आहेत.