वडेट्टीवार-धानोरकर श्रेयवादात भाजपचा 'गेम प्लॅन'; मुनगंटीवारनी टाकली "गुगली"

वडेट्टीवार-धानोरकर वादात भाजपचा 'गेम प्लॅन'; मुनगंटीवारनी टाकली "गुगली"

चंद्रपूर | विजय सिद्धावार

राज्यात काँग्रेसची पीछेहाट होत असताना चंद्रपूर महानगरपालिकेत मात्र पक्षाने मुसंडी मारत विजयाचा गुलाल उधळला. मात्र, हा आनंद फार काळ टिकतो की काय, अशी स्थिती निर्माण झाली आहे. काँग्रेस अंतर्गत असलेल्या धानोरकर विरुद्ध वडेट्टीवार या दोन गटांतील वाद आता चव्हाट्यावर आला असून, याच संधीचा फायदा घेत भाजपने 'महापौरपदाची गुगली' टाकली आहे.

बंडखोरी अन् वर्चस्वाचा पेच

निवडणुकीच्या रणधुमाळीत खासदार प्रतिभा धानोरकर यांनी उमेदवारी वाटपात आपला शब्द प्रमाण मानल्याने आमदार विजय वडेट्टीवार समर्थकांचे पत्ते कट झाले होते. दुसरीकडे, भाजपमध्येही आमदार किशोर जोरगेवार आणि सुधीर मुनगंटीवार समर्थकांमधील 'एबी फॉर्म' नाट्यामुळे अनागोंदी माजली होती. भाजपच्या या विखुरलेल्या फळीचा फायदा काँग्रेसला झाला आणि मतदारांनी काँग्रेसच्या झोळीत दान टाकले.

विजयानंतर 'श्रेयवादाचा' हायव्होल्टेज ड्रामा

काँग्रेस बहुमताच्या उंबरठ्यावर पोहोचली असली तरी सत्तेची चावी कुणाकडे राहणार, यावरून श्रेयाची लढाई सुरू झाली आहे. धानोरकर गट आपली ताकद दाखवत असतानाच, वडेट्टीवारांनी आपली राजकीय रणनीती आखण्यास सुरुवात केली आहे. या नेत्यांच्या वादात विजयी नगरसेवक मात्र संभ्रमात असून, काँग्रेसच्या हातातोंडाशी आलेला घास अंतर्गत कलहामुळे हिरावला जाण्याची भीती कार्यकर्त्यांना वाटत आहे.

भाजपचा 'गेम प्लॅन' आणि मुनगंटीवारांची रणनीती

काँग्रेसमधील या गृहयुद्धावर भाजपचे बारीक लक्ष आहे. "कुणालाही स्पष्ट बहुमत नाही, त्यामुळे भाजपलाही संधी आहे," असे सूचक विधान करून सुधीर मुनगंटीवार यांनी राजकीय खळबळ उडवून दिली आहे. काँग्रेसमधील गटबाजी टोकाला गेल्यास भाजप एखाद्या गटाला छुपा पाठिंबा देऊन किंवा अपक्ष व इतरांना सोबत घेऊन सत्तेचे समीकरण फिरवण्याच्या तयारीत आहे.

सत्तेचा सस्पेन्स कायम!

चंद्रपूर महापालिकेत सध्या तरी 'काँग्रेसची सत्ता, पण संकटात' असे चित्र आहे. काँग्रेसचे दोन्ही गट सामंजस्याने महापौर ठरवतात की भाजप या संधीचे सोने करून 'राजकीय चमत्कार' घडवते, हे पाहणे औत्सुक्याचे ठरेल. चंद्रपूरच्या या 'राजकीय चाणक्यांच्या' खेळात अखेर बाजी कोण मारणार? याकडे संपूर्ण जिल्ह्याचे लक्ष लागले आहे.