धानशेतीत काम करताना वाघाचा महिलेवर हल्ला; पत्नीला वाचविण्याचा प्रयत्न ठरला अपयशी!
पतीसमोरच पत्नीचा दुर्दैवी मृत्यू; पळसगाव वनक्षेत्रातील घटनेने परिसरात भीतीचे वातावरण
उप संपादक
विलास मोहिणकर
चंद्रपूर : - दिनांक. १६/१०/२०२६ चंद्रपूर जिल्ह्यातील चिमूर तालुक्यात येत असलेल्या पळसगाव वनक्षेत्रात धानशेतीच्या कामासाठी गेलेल्या एका महिलेवर दबा धरून बसलेल्या वाघाने अचानक हल्ला केल्याची धक्कादायक घटना समोर आली आहे. या हल्ल्यात उषा अंकुश गुरुनुले (वय ४५, रा. पळसगाव) यांचा दुर्दैवी मृत्यू झाला. पतीसमोरच पत्नीवर काळाने घाला घातल्याने परिसरात हळहळ व्यक्त होत आहे.
प्राप्त माहितीनुसार, उषा गुरुनुले या आपले पती अंकुश गुरुनुले यांच्यासोबत धान पिकाला पाणी देण्यासाठी जंगलालगत असलेल्या शेतात गेल्या होत्या. त्यांचे पती शेतातील डिझेल इंजिनजवळ पाण्याची व्यवस्था पाहण्यात व्यस्त होते, तर उषा या शेतात तण काढण्याचे काम करीत होत्या. याचदरम्यान दुपारी ३ ते ४ वाजेदरम्यान शेतात दबा धरून बसलेल्या वाघाने अचानक त्यांच्यावर जोरदार झडप घातली.
पळसगाव वनक्षेत्रात वाघाच्या हल्ल्याची घटना
प्राथमिक माहितीनुसार, पळसगाव वनक्षेत्रातील कक्ष क्रमांक ५५९, पीएफ १००० परिसरात ही घटना घडली. जंगलालगतच्या शेतांमध्ये शेतीची कामे करणाऱ्या शेतकरी आणि शेतमजुरांच्या सुरक्षिततेचा प्रश्न या घटनेमुळे पुन्हा ऐरणीवर आला आहे.
वनविभागाने शेतकऱ्यांच्या सुरक्षेसाठी उपाययोजना कराव्यात!
जंगलालगतच्या शेतांमध्ये काम करणाऱ्या शेतकरी व शेतमजुरांना वन्यप्राण्यांच्या हल्ल्याचा धोका कायम असतो. या पार्श्वभूमीवर वनविभागाने घटनास्थळाची पाहणी करून परिसरात गस्त वाढवावी, नागरिकांना सतर्कतेचा इशारा द्यावा आणि आवश्यक प्रतिबंधात्मक उपाययोजना कराव्यात, अशी मागणी होण्याची शक्यता आहे.
वाघाच्या या हल्ल्यामुळे परिसरातील शेतकऱ्यांमध्ये भीतीचे वातावरण निर्माण झाले असून, शेतात काम करताना नागरिकांच्या सुरक्षेचा प्रश्न पुन्हा एकदा गंभीर बनला आहे.
कोणत्याही टिप्पण्‍या नाहीत:
झिंदाबाद!